السلام عليكم،
للأسف كتير من الطلبة والخريجين بييأسوا ويقولوا إن عشان يشتغل لازم يكون فيه واسطة وإنه مش شغال بسبب كدة ووو.
في البداية لازم نفرّق بين حاجتين، الواسطة والمعرفة.
الواسطة هي إن حد يشتغل في مكانة هو مش مؤهل ليها بسبب والد أو قريب أو أو أو.
يعني بمعنى أصح أنا مثلًا فاتح شركة أو شغال في شركة في منصب كبير فأقوم أجيب ابني يشتغل عندي وهو معندوش الخبرة.
ودي اللي بتُسمى فعلًا واسطة، والواسطة دي -بالنسبة لينا كصيادلة- موجودة بشكل قليل، لإن شركات الأدوية مش هتجيب حد مش عارف يشتغل أو يعمل المطلوب صح، لإنه كدة هييجي عليها بخسارة.
وبالمناسبة، الواسطة دي حتى لو موجودة فهي آخرها هتوصلك للانترفيو، لكن من أول الانترفيو انت بقى اللي هتكون مسؤول عن نفسك.
مش لازم يكون معاك واسطة عشان تشتغل في مكان كويس، وبلاش الإحساس ده يسيطر عليك عشان هيبقى مبرر ليك لأي فشل في حياتك المهنية.
طيب إيه هي المعرفة؟ باختصار شديد هي إني مثلًا أكون عارف إنك شاطر في حاجة معينة، سواء بقى تسويق أو مبيعات أو أي حاجة تانية، فلما الشركة اللي أنا بشتغل فيها تفتح وظيفة معينة أنا أرشحك ليها وأقولهم إني واثق في إنك تقدر تشتغل وتعمل الوظيفة دي، وهنا ده بيسهل عليك الموضوع برضو في إنك توصل لمرحلة الانترفيو، لكن بعد كدة انت المسؤول عن نفسك.
والكلام ده موجود في كل الشركات وكل الأماكن الكبيرة يا جماعة، جوجل وميكروسوفت وأبل وكل الشركات الكبيرة في الغالب بتطلب منك Recommendation من حد من داخل الشركة، فده شيء عادي ومُتعارف عليه.
طب أنا ازاي أكون معارفي؟ أسهل حاجة هي LinkedIn، اعمل أكونت عليه وابدأ ضيف ناس من شركات الأدوية المختلفة واتعرف عليهم وتابع اللي بينزلوه واتكلم معاهم وهكذا .. ومتنساش طبعًا تبين مهاراتك دايمًا وتعرفهم انت شاطر في إيه، عشان لما وظيفة تفتح عندهم يفتكروك وعلى الأقل يقولولك إن فيه وظيفة كذا قدم فيها.
شارك في التدريبات الصيفية، الأنشطة الطلابية، المؤتمرات والمعارض الصيدلانية..الخ.
كل ده هيساعدك في إنك تكون معارفك.
وفي النهاية، دي تعليقات لناس مختلفة شغالة في شركات أدوية مالتي ناشونال بيجاوبوا على سؤال: هل فعلًا أنا محتاج واسطة عشان أشتغل في شركات الأدوية؟
طريق الصيدلة - Pharma Road 